السلام عليكم جميعاً ورحمة الله وبركاتو
أنا حابة أتشر معاناتي إللي صارت أول أمس الصبح الأربعاء بتاريخ 24 سبتمبر في مستشفى الملك عبد العزيز الجامعي بجدة المتمثلة في دورة (Secrets Of Anatomy )
أولاً : البداية
أنا طالبة من جامعة أم القرى جاني إعلان بإنو في دورة في المستشفى الجامعي بجدة عن أسرار علم التشريح(Secrets Of Anatomy ) ويتم التسجيل من خلال الرابط الإلكتروني دا :
http://www.medicalacademy.org/portal/event/view/175
بدايةً سجلنا من خلال رابط الموقع أنا ومجموعة كبيرة من بنات دفعتي بتاريخ 16 سبتمبر وجاتنا رسايل ع الإيميل بعد كدا أكدت إنو حجزنا مؤكد وح أحط صورة لهدي الرسالة وصلت لوحدة من زميلاتي

https://fbcdn-sphotos-h-a.akamaihd.n...fac7081ed39e78

, وبدينا ننظم روحتنا لمستشفى جامعة الملك عبد العزيز الجامعي وبعض بنت دفعتي جزاهم الله خير حجزوا حافلة وكانت وجهتنا إلى بوابة مكتبة جرير إللي في سوق الحجاز بالرصيفة ممن الساعة 6:30 صباحاً وتم الاتفاق مع صاحب الحافلة إنو الخروج ح يكون الساعة 16:00 مساءاً ولما تم اكتمال العدد توكلنا على الله إلى جدة .
ثانياُ : عند الوصول
دورنا على المبنى المقصود وكان في الطريق في مبنى مستشفى طب الأسنان ع اليمين والعيادات الخارجية أو الخاصة ع اليسار المهم مشينا إلى بوابة فيها درج كأنو درج طوارئ وكان المكان جداً حار وفجأة يوقفونا ويمنعوا دخولنا يحشرونا في مكان مافيه أكسجين بسبب إنهم يبغوا ياخدوا فقط أسماء المسجلات والباقية عليهم السلام
وقفنا في المكان الحار عديم الأوكسجين قرابة النصف ساعة وجداً كان عددنا كبير والمكان مزدحم وبعدها دخبنا على سيب في بنت جالسة ع الكاونتر اللي عند باب القاعة عشان تاخد أسماء البنات المسجلات فقط وتدخلهم ولما دخلت القليل جات وحدة من زميلاتها تقوللها : (( وقفي التسجيل خلاص القاعة .full . )) وكان في بنات واقفات جمبي جاتهم دوخة من الوقفة ي المكان المكتوم داك
علماً بأن غالب البنات خرجوا بدري وحتى ما فطروا عشان خاطر يلحقوا ويجوا بدري والشي إللي أتسبب في إنو وحدة من البنات جاتها دوخة في المعرض لما نزلنا
كان موقفي وكتها إني أنادي إتنين منهم وأقوللهم : كيف يعني القاعة full ؟؟؟؟؟؟!!!!!!!!! انتو ما سجلتوا حسب المقاعد ؟؟؟؟؟؟؟؟؟!!!!!!!!! تقوللي : إلا بس العدد إللي جاء كبير وروحي المعرض خدي لك لفة بلكن عبالو القاعة تصير فاضية وتلقي لك مقعد ... هدي وحدة وكان تعاملها مهو جيد كأنها تقصد بالكلام خلاص راحت عليكي , أما الأخت التانية فكانت جداً محترمة الحمدلله وحاولت تعتذر من سوء التنظيم وبرضو قالت لي كلام شبه كلام زميلتها لكن بطريقة مؤدبة أكتر تقول : ما يرضيني تخرجي وانتي زعلانة مري ع المعرض و أرجعي بعد وقت معين إن شاء الله تلقي لك مقعد , الآدمية جداَ كانت حاسة بالزنب لأن بدأت تنزل دموعي من غير ما أدري وكانت جملتي في داك الوقت ( أنا آدمية تعبانة طلعتوني من مكة إلى هنا عشان تقولوا لي إني مافي مقاعد .. الله يسامحكم )
ثالثاً : في المعرض
خرجت من المبنى وأنا في قمة الحزن ودقيت على أخويا لأنو ولله الحمد ساكن في جدة وخليتو يستأزن من عملو عشان ياخدني لدوام مرتو لأنها نفس الوقت ما كاتت موجودة في البيت ( البهدلة ما كانت بس ليا كانت لأهلي معايا ) وعبال ما تجي سيارتي روحت للمعرض أخدت لي لفة من غير نفس وقابلت لي وحدة من القائمات ع الدورة رجعت أحكي لها معاناتي هي الأخرى وما قدرت تسوي لي شي غير إنها تقوللي وبكل إحترام ( أعتذر عنهم كلهم وأمسحيها بوجهي ) .
أخيراً : قبل خروجي من مستشفى الملك عبد العزيز الجامعي ب10 دقايق
شفت البنات اللي كانوا معايا مخرجينهم في الشمس وقافلين الباب المؤدي لمبنى القاعة وكان هناك في زعيق ووضى .
الشي الكويس إللي حابة أقولوا
كانوا في بنتين مرررة كويسات وكان أسلوبهم جداً راقي معايا وهدا يدل على حسن أخلاقهم وكان المعرض متعوب عليه ماشاء الله تبارك الرحمن ويعطيهم العافية لأن أكيد في غيري دحل واستفاد في المقابل في كتير ما تم التعامل معاه بأسلوب جيد .
إللي حابة أقولوا لهم :
جداً ماكان من الأخلاق إنو نعامل بدي الطريقة اللي محد يرضاها لأخوه المسلم
وسؤالي ؟؟؟؟
_ ليش ما كانت في رسايل بريدية تخبر إنو المقاعد محدودة ( لأن الناس جو من كل حدب وصوب . جامعة أم القرى , ابن سينا , الفارابي ...إلخ ) وفي بعضهم ماهم طلاب مسار صحي .
أو حتى يتم قفل رابط التسجيل عند إكتمال العدد .
أتمنى يوصل صوتي لكم
و أعتذر عن أي لفظ تجريحي إذا وجد
شكراً .
The Secret of Anatomy | Virtual Medical Academy
www.medicalacademy.org